سيدي بنور سوق الاشباح
كان يعمر بلا شطارة
تسمع في البوق الصياح
من صحاب اللواني و العطارة
و تسمع اللغيط من البراح
من صحاب الريكلام و الخضارة
و تسارا فيه بلا تدواح
تدخل للرحبات و اتسارا
و تعمر أتاي في الصباح
عند الشفناجة و الحرارة
و لا تشوي الكبدة و ترتاح
را الشواية حدا الكزارة
الخروف المشوي لحمو فواح
المعزي محمر بالحرارة
و تشري الخبزة قد الفراح
و للحواتة تدير زيارة
و تشري البنان و التفاح
و الحلوى نواع كثيرة
الزبدة و السمن عند الملاح
لطيب و هاري تشري شكارة
و تدخل لرحبة الدلاح
و الزريعية و العبارة
و الغرابلية لعندهم ترواح
و تشوف الرامة و البكارة
و تشوف تما عود السناح
رحبة التشعويد و السحارة
اصحاب البخور و لرياح
و حداهم رحبة القمارة
و السمايرية ما معاهم مزاح
اصحاب السماوي و المخارة
طريقهم ما فيها الصلاح
السوق ريتلوه الشفارة
كنهضر على دوك الصحاح
غير افهمني بلا إشارة
في الشتا مغيس بلا صلاح
و في الصيف العجاجة دوارة
سوق الثلاث ربى الجناح
حتى الجوطية و القزدارة
و ليوم فرفر و راح
بقا غير الزبل و الغبارة
بقاو كواغطو كيف لشباح
سوق الثلاث مشا خسارة
بقلم : الشاعر و الزجال النحات رضوان ابن مدينة سيدي بنور
قم بكتابة اول تعليق